الحكومة تشكلت

صولاغ للوزارة والچلبي للنفط وهادي العامري للدفاع!!




كتبها جلال چرمگا / زيورخ






حمدان يقترح : باقر صولاغ لرئاسة الحكومة وأحمد الچلبي للمالية والنفط وهادي العامري للدفاع وأبو درع للداخلية وعبدالفلاح السوداني للتجارة !!!




لله الحمد وأخيرا فرجت ، لقد توحدت كل من دولة القانون وألأئتلاف العراقي تحت خيمة واحدة ولاينقصهم غير أربع أو خمس ( نفرات ) حتي يتمكنوا من تشكيل الحكومة الجديدة ولأربعة أعوام... اللهم أجعل السنوات القادمة خير وبركة ورخاء.. ويوم أسود على الحرامية والقفاصة والنكَرية ومهربي النفط الخام .. آمين يارب العالمين ..
بموجب ألأتفاق المبرم مع الكتلتين وبموجب القانون والديمقراطية الموجودة اليوم .. إذا من حقهم أن يشكلوا حكومة ولمدة أربعة سنوات.. الى هنا والمسألة متعارف عليها ومايرادلها روحة لا الى قاضي ولا الى حجة ألأسلام والمسلمين السيد ( على اللامي) ولا غيره... المسألة واضحة كوضوح الشمس في رابعة النهار... نشكر الله .
أكيد هذا ألأئتلاف وهذه الوحدة لم تأت أعتباطا.. بل أجتمعوا.. تفرقوا.. أجتمعوا مرات ومرات.. وبدأت الوساطات من غيرهم وكان سماحة السيد / مقتدى الصدر ( دام ظله الوارف) على التيل ( الخط) بواسطة خط ساخن وتلفون / ثريا أخر موديل ( الله وكيلكم لاتشويش ولا خشخشة!!.. صااااااافي وكأنه داخل ألأجتماع) .. وقرروا أن يكون رئيس الوزراء غير المالكي .. والسبب لكونه ترأس الحكومة أربعة أعوام..( كااااافي.. لزكَة خو مو لزكَة ؟؟؟) .
تحصيل حاصل هنالك غيره لأستلام الرئاسة وقيادة القوات المسلحة البرية والجوية والبحرية وقوى ألأمن الداخلي وألأجهزة الخاصة والعامة وأدارة السجون العامة والسرية.. وغيرها...!!.
ونحن نحلل ونضرب أسداس بأخماس وبالعكس.. وإذا بالأخ / حمدان البغدادي يطل علينا وتحت أبطه رزمة أوراق.
بعد السلام والتحية وطيب الخاطر وأعتدال ألأوقات وتبادل القبلات ( على طريقة / فخامة الرئيس مام جلال) وتفضل أستريح وجيبله جاي من راس القوري وطاسة ماي جلاب من تحت الحب ! .. وأخيرا نطق :
ـ أخوان.. مبروك عالجميع.. وأخيرا أنحلت ألأزمة.. وأني بهذه المناسبة جلست وفكرت وقررت مايلي:
هو مجرد أقتراح الى سماحة السيد / عمار الحكيم بصفته ( جبير الكل) وكلمته ماتصير أثتين.. أقترحت عليه تشكيلة الوزارة الجديدة وكالأتي :



أضحك .. وأخيرا.. الف مبروك.. تستاهل.. يعني وين أكو أحسن منك؟؟؟

أولا / ألأخ العزيز ومهجة القلب ـ جبر صولاغ الزبيدي ـ واللي كان أسمه الحركي ـ بيان جبر ـ لرئاسة الحكومة وقائدا عاما للقوات المسلحة.
ومن حيثيات هذا ألأقتراح : الرجل أستلم أكثر من وزارة ( ألأسكان ، الداخلية ، المالية ) وكلها وزارات حساسة ومهمة.. لذلك ( معقولة يبقى وزير ؟؟؟) .. لا فالرجل ضليع بأمور ألأمن والسجون السرية وصرف ألأموال وغيرها.. لذلك لابديل له وهذا قراري والكم حق النقض لابل حتى الفيتو !!( ليش شنهو الفرق بين النقض والفيتو )؟؟؟ .. ماكو فرق بس حبيت أدخل شوية مصطلحات أجنبية علمود ألأخوة ألأمريكان يقتنعون بديمقراطيتنا.. لعد شلون؟؟ شعبالكم ؟؟؟.



شتريدون بعد؟؟

من عميل للـ ( CIA)

الى متدين محترم أبو ثلاث خواتم !!




ثانيا / الدكتور أحمد الچلبي للنفط والمالية ، الرجل غني عن التعريف.. هو كان يحلم برئاسة العراق ولكم ( منين ياحسرة؟؟) .. طلع هبياض .. أيد من ورا وأيد من كَدام.. يعني( لاحظت برجليها ولاخذت سيدعلي!!) .
ومن حيثيات ألأقتراح : الرجل دكتوراه في الرياضيات( طرح وقسمة وضرب وجمع ) .. وألأهم هو مصرفي يعني معقولة ماسمعتم ترأسه لبنك / البتراء ألأردنية ؟؟؟.
والنفط هم الها علاقة بالضرب والجمع !! .. وحق الله لاييبس النفطات.. ونطلع ولا تنكة نفط .. كلها ( أنزلناه في الجيوب والمصارف الخاصة ).. خو ألأردن؟؟؟ مايعطيهم ولاقطرة نفط لابل حتى نفط أسود.. شلون ليش نسى مذكرة ألأعتقال؟؟؟.. يستحيل...!!.
إذا الرجل المناسب في المكان المناسب!!!... أضرب أبو / تمارا .. وأخيرا تحقق حلمك.. بس لازم تدعيلي.. مو أني الرشحتك؟؟؟.



عالخير حاج هادي .. تستاهل.. تلوكَلك وزارة الدفاع ووراك علم منظمة بدر!!


ثالثا / الحاج هادي العامري ( حفظه الله ) لوزارة الدفاع ـ رئيس منظمة بدر ـ في المجلس ألأعلى .. هذا ألأخ :
ـ رئيس لجنة الدفاع في البرلمان الماضي .
ـ خبير في الشؤن العسكرية وألأغتيالات وثقب الرؤس بالدريل وغير الدريل ... له أطلاع والمام بمساكن ودور كل الضباط والطيارين في الجيش العراقي السابق.. يندلهم واحد واحد..!!.
ـ مدرب لعقود من الزمن في أيران وله مئات التجارب والخطط الناجحة ..
من حيثيات ألأقتراح : والنبي فلة.. فلا أكو أحسن منه.. هذا قرار قطعي لافيتو ولانقض.. تريد أرنب أخذ أرنب.. تريد غزال أخذ أرنب ..



وأخيرا / أبو درع تحقق حلمك.. أضرب تكة وكباب.. ليش لاء قابل وحد؟؟


رابعا / أبودرع لوزارة الداخلية .. الرجل أشهر من نار على علم.. معرووووووف جدااااااااااا.. لامناقشة.. مومشكلة أمي.. أمي.. الرجل صادق خو ( سوق مريدي ) بصفه كان يكَدر يزورله أقل شىء شهادة ماجستير بالفلسفة لو بالقانون الدولي .. ولكن قال مستحيل أسويها.. الله عليكم أكو واحد أعدل وأصدق من هذا الرجل؟؟؟.
ماقبل مطلقا..لذلك لابد أن يكون وزير داخلية.. وزير ونص.. لو هو لو الغوا وزارة الداخلية.. أختاروا ..!!.



والله ما خلوك تسقط !!!.. رجعوك وبالخدمة .. مبروووك.. أسرق على راحتك!!

خامسا / عبد الفلاح السوداني للتجارة.. الرجل ماشاءالله نجم لامع وساطع في سماء التجارة والرشاوي والتلاعب بالحصة التموينية.. الله وكيلكم جاب ملح من ( الفاو) وفرضها عالحكومة والشعب وكَال:
هذا سكر برازيلي أصلي.. أخزنوا بالبيت ورا شهر يصير شكر بلوووري.. الحكومة صدكَت.. والناس صارلهم سنة ونص خازنين الملح وبقى ملح.. ياسبحان الله ولا تغير .. بس صار بيه خيط مرورة لاغير..!!!.
بعدين تعالوا.. الرجل شمسوي؟؟ يعني كل اللي سرقه مايساوي مليااار دولار.. شنهو قيمة المليار؟؟ .. يعني الرجل أقلاها عنده خبرة.. وألأهم تعهد أن يعوض أهل الملح بسكر كوبي من المنشأ ألأصلي.. خوش كرم.. خوش مكرمة.. خوووووش.. الله وكيلكم لو هو لو مايصير غيره وزير تجارة... يعني بس هو طلع حرامي؟؟؟... خو الحرامية بالكَوشرات... بيك خير وأخذ حرامية.. وحلف بكل المقدسات أنه في رمضان القادم ليغرك العوائل العراقية بالحمص والعدس... هااي.. هااي.. أضربوا يا العراقيين.. هم حمص وهم عدس.. حلووووو.. كَولوا موخوش وزير؟؟.

الى هنا وبس.. البقية أنتوا أختاروهم... ما أتدخل.. عاشت الحكومة والموت لأعداء الحكومة .. الموت للأستعمار والطامعين بثروات العراق.. أننا في الوقت الذي...
ـ حمداااااااان... هاي شبيك أشو كَمت تخطب..
* أخذني الحماس.. أودعناكم أروح أقدم ألأقتراح لسماحة السيد.. شكرا عالچاي.. بس كان مالح.. يمكن بدل الشكر حطيتونة الملح مالة معالي الوزير .. مايهم معاليه تعهد أن يعوضنة... باااااااي.. بااااي .. قشمرة وروح أبوية قشمرة وطرطرة !! .

[b]